Main Menu

ગોપાલગ્રામનાં શ્રમજીવી પરિવારનાં અઢી વર્ષનાં બાળકને દીપડાએ મોતને ઘાટ ઉતારતા અરેરાટી

પરિવાર સાથે સૂતેલ નિર્દોષ બાળકને દીપડાએ મોંમાં દબોચી લીધો

અમરેલી, તા.ર6

અમરેલી જિલ્‍લાના ગીર કાંઠા વિસ્‍તારમાં છાશવારે વન્‍ય પ્રાણીઓ દ્વારા માનવ જીવ ઉપર હુમલા થતાં હોય છે. તેમાં ખાસ કરીને વન્‍ય પ્રાણી દીપડાઓ ગીર કાંઠાના ગામની સીમમાં વસતા ખેત મજૂરો અને તેમના પરિવારના લોકોનો શિકાર કરતા હોય છે. પરંતુ ચલાલા નજીક આવેલ ગોપાલગ્રામ ગામમાં આવેલ મફતપરા વિસ્‍તારમાં રહેતા પરિવારના ર વર્ષના બાળકનેસમી-સાંજના સમયે દીપડો ઉઠાવી જઈ બાળકનો શિકાર કરી નાખવાની ઘટના બનતા ચલાલા પંથકમાં ખળભળાટ મચી જવા પામ્‍યો છે. આ લખાય છે ત્‍યારે વન વિભાગ તથા પોલીસ ઘટના સ્‍થળે દોડી જઈ બાળકને ફાડી ખાનાર દીપડાની શોધખોળ આદરી છે.

આ બનાવમાં જાણવા          મળતી વિગત મુજબ ધારી તાલુકાના ગોપાલગ્રામ ગામે આવેલ મફતપરા વિસ્‍તારમાં રહેતા અને મજૂરી કામ કરતા કિશોરભાઈ મનસુખભાઈ વાઘેલા તથા તેમનો પરિવાર ગઈકાલે રાત્રીના 9 વાગ્‍યા આસપાસ જમી અને પોતાના ઝુંપડામાં સૂતો હતો ત્‍યારે બીલ્‍લી પગે એક કદાવર દીપડાએ આવી ત્‍યાં સૂતેલા આશરે અઢી વર્ષના એભલ કિશોરભાઈ વાઘેલા નામના બાળકને મોં વડે પકડી લઈ દીપડો નાશવા લાગ્‍યો હતો.

પરંતુ બાળકની રાડારાડથી તેમનો પરિવાર જાગી જતાં આખો પરિવાર પોતાના વ્‍હાલસોયા પુત્રને બચાવવા માટે આ બાળકના દાદા સહિતના લોકો દીપડાની પાછળ દોડી ગયા હતા પરંતુ દીપડાએ અંધારાનો લાભ લઈ નાશી છૂટયો હતો.

આ બનાવ અંગેની જાણ ગોપાલગ્રામના લોકોને થતાં લોકોએ વન વિભાગ અને પોલીસ વિભાગને જાણ કરવામાં આવતા આ દીપડાની તથા બાળકની લોકોએ અંધારામાં શોધ ચલાવી હતી.

ત્‍યારે મોડી રાત્રીના સમયે આ માનવભક્ષી દીપડો ગોપાલગ્રામથી માણાવાવ ગામ તરફ જતા માર્ગ ઉપર આવેલ એક વાડીમાં જયાંજારનું વાવેતર કરેલ હોય ત્‍યાં હોવાનું જાણમાં આવતા લોકોએ દીપડાને ભગાડયો હતો.

પરંતુ આ દીપડાએ અઢી વર્ષના બાળકનું અડધા ઉપરાંતનું માંસ ખાઈ જતાં આ બાળકનું મૃત્‍યુ નિપજયું હતું. આ ઘટનાની જાણ થતા આજુબાજુના લોકોમાં ભારે                        ખળભળાટ મચી જવા પામ્‍યો છે.

વન વિભાગ દ્વારા માનવભક્ષી દીપડાની શોધખોળ આદરી છે. અને દીપડાને પીંજરે પુરવાની મથામણ શરૂ કરી દીધાનું જાણવા     મળેલ છે.