Main Menu

હીંડોરણા ચોકડી પાસે બસ-ટ્રક વચ્‍ચે અકસ્‍માત : ટ્રાફીક જામ

અમરેલી, તા.9

ભાવનગર-સોમનાથ હાઈ-વે વચ્‍ચે છેલ્‍લા ઘણાં જ સમયથી માર્ગનું કામ ચાલુ હોય, ત્‍યારે આ માર્ગ ઉપર આવતા ડાઈવર્ઝન તથા ભારે ટ્રાફીકનાં કારણે છાસવારે ટ્રાફીક જામ થઈ જાય છે. હજુ ગઈકાલે પણ ટ્રાફીક જામની ઘટના બન્‍યા બાદ આજે હીંડોરણા ચોકડી પાસે એક બસ અને ટ્રક વચ્‍ચે અકસ્‍માત સર્જાતા ર કિ.મી. સુધી ટ્રકોની લાઈન થઈ જતાં ટ્રાફીક જામ થયો હતો.

આ બનાવમાં મળતી વિગતો મુજબ રાજુલા નજીક આવેલ હીંડોરણા ચોકડી પાસે ભાવનગર-ઉના રૂટની બસ અને એક ટ્રક વચ્‍ચે અકસ્‍માત થયો હતો જેના કારણે બસનાં આગળનાં કાચનો બુકડો થઈ જવા પામતાં મુસાફરોમાં ભારે અફડાતફડી મચી જવા પામી હતી. સદનસીબે કોઈને ઈજા થવા પામી ન હતી.

પરંતુ આ અકસ્‍માતનાં કારણે ભાવનગર-સોમનાથ હાઈવે ઉપર ર કિ.મી. લાંબી ટ્રકોની લાઈન થઈ જતાં ટ્રાફીક જામ સર્જાયો હતો. પોલીસે ઘટના સ્‍થળે દોડી જઈ ટ્રાફીક હળવો કરવા મથામણ કરવી પડી હતી.



« (Previous News)