Main Menu

ઉચૈયા ગામની તરૂણીને ભગાડી જઈ દુષ્‍કર્મ કરનાર શખ્‍સને 7 વર્ષની સખત કેદ

રૂા. 1પ હજાર દંડમાંથી 10 હજારનું વળતર ચૂકવવા હુકમ

અમરેલી, તા.ર

રાજુલા તાલુકાના ઉચૈયા ગામે રહેતા ભાવેશ પોપટભાઈ વાઘેલા તથા કૃણાલ ઉર્ફે કરમણ ગોબરભાઈ મોરી નામના બે ઈસમો ગત તા. 8/ર/17ના રોજ તે ગામે રહેતી એક 16 વર્ષીય તરૂણીને લલચાવી ફોસલાવી બદકામ કરવાના ઈરાદે ભગાડી ગયેલ. જયાં આરોપી કૃણાલ ઉર્ફે કરમણ ગોબરભાઈ મોરી નામના શખ્‍સે તરૂણી સાથે અવાર નવાર શરીર સંબંધ બાંધેલ હોય, આ અંગે જે તે સમયે રાજુલા પોલીસ સ્‍ટેશનમાં ફરિયાદ નોંધાવતા પોલીસે ધોરણસર તપાસ હાથ ધરેલ હતી.

આ અંગેનો કેસ રાજુલા ગામે આવેલ એડી. સેશન્‍સ કોર્ટમાં ચાલી જતાં એડી. સેશન્‍સ જજશ્રી એ.કે. શાહે આરોપી કૃણાલ ઉર્ફે કરમણ મોરીને 7 વર્ષની સખત કેદ અને રૂા. 1પ હજારના દંડની સજાનો હુકમ કરેલ હતો. જયારે ભાવેશ પોપટભાઈ વાઘેલાને નિર્દોષ છોડી મુકવાનો પણ હુકમ કર્યો હતો. રૂા. 1પ હજારની વળતરની રકમમાંથી ભોગ બનનાર તરૂણીને રૂા. 10 હજારનું વળતર ચૂકવવાનો હુકમ કર્યોહતો. ભાવેશ વાઘેલા તરફે રાજુલાના એડવોકેટ વિપુલભાઈ જાનીએ દલીલો કરી હતી.