Main Menu

અમરેલીમાં બિલાડીનાં ટોપની જેમ ફૂટી નીકળેલ હોસ્‍પિટલની ચકાસણી જરૂરી

મોટાભાગની હોસ્‍પિટલમાં આરોગ્‍યનાં નિયમોનો ઉલાળીયો

અમરેલીમાં બિલાડીનાં ટોપની જેમ ફૂટી નીકળેલ હોસ્‍પિટલની ચકાસણી જરૂરી

દર્દી નારાયણની સેવા કરવાના બદલે અમુક તબીબો મલાઈતારવવાનાં ધંધે ચડી ગયા છે

અમરેલી, તા.9

અમરેલી શહેરમાં બિલાડીનાં ટોપની જેમ જયાં ત્‍યાં શરૂ થઈ રહેલ હોસ્‍પિટલની ચકાસણી કરવાનો સમય આવી ચૂકયો છે. શહેરની મોટાભાગની હોસ્‍પિટલમાં આરોગ્‍ય વિભાગના નિયમોનો     ઉલાળીયો થઈ રહયાનું દર્દી નારાયણ જણાવી રહયા છે.

શહેરમાં દિ ઉગેને કોઈને કોઈ સ્‍થળે હોસ્‍પિટલ શરૂ થઈ રહી છે. આશ્ચર્યજનક બાબત એ છે કે રહેણાંક વિસ્‍તારોમાં પણ આડેધડ હોસ્‍પિટલ શરૂ થતાં અડોશ-પડોશનાં સ્‍થાનિક વેપારીઓને ઘોંઘાટનો સામનો કરવો પડી રહયો છે.

તદ્‌ઉપરાંત, મોટાભાગના તબીબો નિદાન ફી કે ઓપરેશન ફીનાં નામે ઉઘાડી લૂંટ ચલાવી રહયા છે. તો રૂમ ચાર્જ, દવા અને લેબોરેટરીમાં પણ તગડું કમિશન મેળવી રહયા છે. મોટાભાગના તબીબો નિદાન ફીની કોઈ પહોંચ આપતા નથી અને દર વર્ષે બેઈમાનીથી લાખો રૂપિયાનું કાળુ ધન એકત્ર કરી રહયાની પણ ફરિયાદ ઉભી થઈ રહી છે.

તદ્‌ઉપરાંત, મેડિકલ વેસ્‍ટ, સ્‍ટાફને જરૂરી પગાર કે સવલત, દર્દી નારાયણનાં ખિસ્‍સા ખંખેરવાનાં ધંધા સહિત અનેક મામલે ફરિયાદનું પ્રમાણ વધી રહયું છે. તો ગર્ભ પરિક્ષણની ફરિયાદ ઉભી થઈ છે. તો બિનજરૂરી સોનોગ્રાફી, સીઝેરીયન મામલે પણ અનેક તબીબોની કામગીરી શંકાના દાયરામાં આવી  રહી છે.

શહેરમાં એક-બે નહીં બલ્‍કે અનેક હોસ્‍પિટલ આરોગ્‍ય અનેઆવકવેરા વિભાગના નિયમોનો ઉલાળીયો કરતી હોય કલેકટર દ્વારા ખાસ ટીમની રચના કરીને તબીબી વ્‍યવસાયને બદનામ કરતા અમુક લેભાગુ તબીબોની હોસ્‍પિટલની ચકાસણી કરવામાં આવે તેવી માંગ દર્દી નારાયણમાંથી ઉભી થવા પામી છે.