Main Menu

અભ્‍યાસ સાથે માર્ગ સલામતી સંબંધિત શિક્ષણને સાંકળી લેવામાં આવે તો પરિસ્‍થિતિમાં પરિવર્તન લાવી શકાય : કલેકટર આયુષ ઓક

અમરેલી તા.4

અમરેલી જિલ્‍લામાં માર્ગસલામતી મેળાના પ્રારંભ પ્રસંગે, કલેકટર આયુષ ઓકે જણાવ્‍યુ હતુ કે, કાયદાઓ હોય પણ તેની અમલવારીમાં ખામી હોય તો તેની અસરકારકતા રહેતી નથી તેવી રીતે માર્ગ સલામતી માટેના કાયદાઓ હોય પરંતુ તેના અમલ માટે નાગરિકોએ જાગૃત્ત રહેવાની જરૂરિયાત રહે છે.

પરંપરા અનુસાર કાર્યક્રમનો શુભારંભ દીપપ્રાગટયથી કર્યા બાદ કલેકટર આયુષ ઓકે તુલસી કયારે જળ અર્પણ કરી પ્રકૃત્તિ પૂજનનો સંદેશ આપ્‍યો હતો. પ્રાસંગિક પ્રવચનમાં ઓકે કહ્યુ કે, વાહન ચલાવતા દરેક નાગરિકે વાહન ચલાવવા અંગેની તેમની ફરજો અને માર્ગ પરની સલામતી જાળવવી જરૂરી છે.

તેમણે વધુમાં કહ્યુ કે, શાળાકક્ષાએ અભ્‍યાસની સાથે માર્ગ સલામતી સંબંધિત શિક્ષણને સાંકળી લેવામાં આવે તો પરિસ્‍થિતિમાં પરિવર્તન લાવી શકાય છે. માર્ગ સલામતી ઝૂંબેશ અને કાયદાકીય અમલવારી માટે રાતો રાત ફેરફાર ન આવી શકે. શાળા સ્‍તરે વારંવાર માર્ગ સલામતી જાગૃત્તિ કાર્યક્રમો યોજવામાં આવે તો તેની અસરો પણ લાંબા સમય સુધી રહે છે.

માર્ગ પરની સલામતીનું મહત્‍વ સમજાવતા ઓકે તેમના પ્રવચનમાં વિદ્યાર્થીઓને શીખ આપતા કહ્યું કે, કેટલા માર્કસ આવે એ કરતા કેટલા સારા નાગરિક બનીએ તે વધુ મહત્‍વનું છે.

આસિટન્‍ટ વાહન વ્‍યવહાર અધિકારી પી.આર. પઢિયારે માર્ગ સલામતી કાર્યક્રમની રૂપરેખા આપતા જણાવ્‍યુંકે, માર્ગ સલામતીના પગલાઓનો અમલ કરવો સૌ નાગરિકોની ફરજ છે. તેમણે વાહન ચલાવતા સમયે હેલ્‍મેપટ અને સીટ બેલ્‍ટ પહેરવાની જરૂરિયાતને સમજાવી હતી. વાહનને શોખ નહિ પરંતુ જીવનની જરૂરિયાત સમજીને ચલાવવાની અપીલ પણ તેમણે કરી હતી.

કલેકટર આયુષ ઓકે માર્ગ સલામતી પ્રદર્શનીને ખુલ્‍લુ મૂકી તે પ્રદર્શની નિહાળી હતી. માર્ગ સલામતી માટે યોજાયેલ વિવિધ સ્‍પર્ધાઓના વિજેતા વિદ્યાર્થીઓને કલેકટરએ સન્‍માનિત કરી પ્રોત્‍સાહિત કર્યા હતા. કલેકટરએ માર્ગ સલામતી માટે રજૂ કરેલા વિચારો અને પ્રયોગો માટે વિદ્યાર્થીઓને અભિનંદન પાઠવ્‍યા હતા.

વિદ્યાર્થીઓએ માર્ગ સલામતીને ઘ્‍યાને લઇ ઇતની સેફટી હમે દેના દાતા રચનાત્‍મક શબ્‍દોમાં પ્રાર્થના રજૂ કરી હતી. વિદ્યાર્થીઓને માર્ગ સલામતીના ભાગરૂપે ટ્રેક નિદર્શન કર્યુ હતુ.પાઠક સ્‍કુલ ખાતે યોજાયેલ આ કાર્યક્રમમાં સેજપાલ શિવાનીએ માર્ગ સલામતી અને ટ્રાફિક નિયમન પર વકતવ્‍ય આપ્‍યુ હતુ. કાર્યક્રમનું સંચાલન મનોજભાઇ પંડયાએ કર્યુ હતુ. સંસ્‍થાના ડાયરેકટર ભટ્ટે કલેકટર તથા મહાનુભાવોનું પુસ્‍તક અને પુષ્‍પગુચ્‍છથી સ્‍વાગત કર્યુ હતુ.

કાર્યક્રમમાં અમરેલી જિલ્‍લા સહાયક પ્રાદેશિક વાહન વ્‍યવહાર અધિકારી સોલંકી,  આસિસ્‍ટન્‍ટ વાહન વ્‍યવહાર અધિકારી સર્વ ઠુંમર, નાડોદા, કેવલ મહેતા, શાળાના શિક્ષકઓ અને વિદ્યાર્થીઓ તથા વાહન વ્‍યવહારકચેરીના અધિકારી – કર્મચારીઓ ઉપસ્‍થિત રહ્યા હતા.



« (Previous News)