Main Menu

અમરેલીનાં ચક્કરગઢ માર્ગ પર મિત્રનાં હાથે મિત્રની હત્‍યા કરવામાં આવતા ચકચાર

ર વ્‍યકિતએ પકડી રાખીને ત્રીજા વ્‍યકિતએ છરી ઝીંકી દીધી

અમરેલી, તા.ર

અમરેલીના ચકકરગઢ રોડ, દાનેવ પાન સામે ગઈકાલે મોડી રાત્રીના સમયે એક 30 વર્ષીય યુવાન સાથે ત્રણ સવારી બાઈક ઉપર આવેલા શખ્‍સોએ કોઈ કારણોસર બોલાચાલી કરી ઉશ્‍કેરાઈ જઈ છરીના આડેધડ ઘા મારી યુવકને ગંભીર ઈજા કરતા ઘવાયેલા યુવકને સારવાર માટે પ્રથમ અમરેલી અને વધુ સારવાર માટે રાજકોટ દવાખાને ખસેડવામાં આવેલ. જયાં તેમનું સારવાર દરમિયાન મોત નિપજયું હતું.

આ બનાવ અંગે પોલીસ સૂત્રોમાંથી મળતી વિગત મુજબ અમરેલીના બાયપાસ રોડ ઉપર આર.ટી.ઓ. ઓફિસ સામે રહેતા મહેશ રતિલાલ ઝાલા નામના 30 વર્ષીય યુવક ગઈકાલે રાત્રે અત્રેના ચકકરગઢ રોડ ઉપર આવેલ દાનેવ પાનના ગલ્‍લે ઉભા હતા ત્‍યારે અમરેલીના ચિરાગ ઠાકર તથા અન્‍ય બે અજાણ્‍યા ઈસમો ત્રણ સવારી મોટર સાયકલમાં ત્‍યાં આવેલ અને રાત્રે 11:4પ કલાકે કોઈ કારણોસર બોલાચાલી કરી, ચિરાગ ઠાકરે પોતાની પાસે રહેલ છરી વડે આ મહેશભાઈ ઉપર તૂટી પડી ગંભીર ઈજાઓ કરી હતી. જયારે બે અજાણ્‍યા શખ્‍સોએ પણ મદદગારી કરી હતી.

આ બનાવની જાણ મૃતક યુવકના પિતા રતિલાલ રામજીભાઈ ઝાલાને થતાં તેઓ તાત્‍કાલિક ઘટના સ્‍થળેપહોંચી લોહી લુહાણ હાલતમાં પડેલા પોતાના પુત્રને પ્રથમ અમરેલી અને વધુ સારવાર માટે રાજકોટ દવાખાને ખસેડાતા મૃતક મહેશભાઈનું રાજકોટ દવાખાને મોત થયું હતું.

આ બનાવ અંગે પોલીસે મૃતકના પિતાની ફરિયાદ લઈ આરોપીને ઝડપી લેવા ચક્રો ગતિમાન કર્યા છે.