Main Menu

મહાત્‍મા ગાંધીની જન્‍મજયંતિએ : અમરેલીમાં ડાયાબિટીસ ચેકઅપ કેમ્‍પ અને જનજાગૃતિ અભિયાન યોજાયુ

અમરેલી તા.ર

મહાત્‍મા ગાંધીજીની 1પ0મી જન્‍મ જયંતિની ઉજવણી નિમિત્તે લાયન્‍સએ કલબ ઓફ અમરેલી (રોયલ) દ્વારા અમરેલી સ્‍થિત સરદાર સર્કલ અને જેસીંગપરા ખાતે ડાયાબિટીસ મેડિકલ ચેકઅપ કેમ્‍પ અને જનજાગૃત્તિ અભિયાનનું આયોજન કરવામાં આવ્‍યું હતુ.

જિલ્‍લાવિકાસ અધિકારી યોગેશ નિરગુડેએ દીપપ્રાગટય કરી કાર્યક્રમને ખૂલ્‍લો મૂકયો હતો. તેમણે જણાવ્‍યું કે, આરોગ્‍યક્ષેત્રે જાગૃત્તિ લાવવી જરૂરી છે. રાજય સરકાર દ્વારા કરવામાં આવતી આરોગ્‍યલક્ષી વિવિધ પ્રવૃત્તિઓ વિશે તેમણે વિગતો આપી હતી. ગ્રામ્‍ય વિસ્‍તારમાં સ્‍વચ્‍છતા અને આરોગ્‍યલક્ષી જાગૃત્તિ કેળવાય તે જરૂરી હોવાનું તેમણે ઉમેર્યુ હતુ.

નિરગુડેએ કહ્યું કે, સમય સાથે યોગ્‍ય માર્ગદર્શન અને સારવાર        મળી રહે તો રોગ કે માંદગીની ગંભીરતાને ઘટાડી શકાય છે, આથી આ પ્રકારે થતાં આરોગ્‍યલક્ષી કેમ્‍પ ઉપયોગી નિવડે છે. નિયમિત રીતે આરોગ્‍ય ચકાસણી કરાવવામાં આવે તે જરૂરી છે. સામાજિક જાગૃત્તિ માટે સહકાર આપવા અપીલ કરી હતી. મહાત્‍મા ગાંધીના દ્રષ્ટાંતો આપી તેમના સંસ્‍મરણોને તાજા કર્યા હતા.

મુખ્‍ય જિલ્‍લા આરોગ્‍ય અધિકારી ડો. જયેશ પટેલે પ્રાસંગિક પ્રવચન કરતા કહ્યું કે, સ્‍વ્‍ચ્‍છતા અને આરોગ્‍ય એકબીજા સાથે સંકળાયેલા છે. સ્‍વ્‍ચ્‍છતા જાળવવાથી આરોગ્‍ય નિરોગી રહે છે. આરોગ્‍ય વિભાગની વિવિધ યોજનાઓ વિશે જણાવી તેમણે જરૂરિયાતમંદોને તેનો લાભ લેવા જણાવ્‍યું હતુ.

રોટરી કલબ ઓફ અમરેલી દ્વારા ટીબીના દર્દીઓને ન્‍યુટ્રિશ્‍યન કિટ વિતરણ કરવામાં આવેલ. આ તકે આરોગ્‍ય શાખા – અમરેલી દ્વારા પેમ્‍પલેટસ વિતરણ કરવામાં આવ્‍યું હતુ. મહાનુભાવોએ સફાઇ શ્રમદાન કરવામાંઆવ્‍યું હતુ.

કાર્યક્રમમાં અમરેલી પ્રાંત અધિકારી ડી.એન. સતાણી, જિલ્‍લા પ્રાથમિક શિક્ષણાધિકારી જાદવ, અમરેલી તાલુકા મામલતદાર, શિક્ષણ કચેરીના ડામોર, જિલ્‍લા ગ્રામ વિકાસ એજન્‍સીના વાઢેર, આરોગ્‍ય શાખા – અમરેલી સહિતના અધિકારી, કર્મચારીઓ અને અમરેલીના નગરજનો ઉપસ્‍થિત રહ્યા હતા. શાબ્‍દિક સ્‍વાગત લાયન્‍સ કલબ ઓફ અમરેલી (રોયલ)ના પ્રમુખ વસંતભાઇ મોવલીયાએ કર્યુ હતુ. સમગ્ર કાર્યક્રમનું સંચાલન સુરેશ દેસાઇએ કર્યુ હતુ.