Main Menu

બિસ્‍માર માર્ગો,રખડતા પશુઓ અને બેફામ ગંદકીએ ઉપાડો લીધો છે

અમરેલી, તા. 18

રાજયને સૌ પ્રથમ મુખ્‍યમંત્રીની ભેટ આપનાર અમરેલી શહેર આજે નેતાગીરીનાં અભાવથી અનાથ બની ગયું છે. શહેરમાં અગણિત સમસ્‍યાઓ હોવા છતાં પણ ધારાસભ્‍ય કે સાંસદ તો ઠીક નગરસેવકો પણ એકપણ શબ્‍દ બોલતા નથી.

શહેરમાં ભુગર્ભ ગટરનાં પાપે અનેક માર્ગો અતિ બિસ્‍માર બની ગયા છે. થોડો વરસાદ પડે તો મુશ્‍કેલીમાં વધારો થાય છે. શહેરનાં હાર્દસમા ચિતલ રોડ, વરસડા રોડ, સ્‍ટેશન રોડ સહિતનાં વિસ્‍તારમાં પસાર થવું એટલે તોબા તોબા.

શહેરનાં માયકાંગલા નેતાઓ અધિકારીઓનો કાન આમળતા નથી અને અધિકારીઓને સ્‍વાભાવિક રીતે જનતા જનાર્દનની કાંઈ પડી નથી.

જનતા જનાર્દન દર વર્ષે કરોડો રૂપિયાનાં કરવેરા ભરે છતાં પણ પ્રાથમિક સુવિધા મેળવી શકતી નથી અને રાજકીય કાર્યકરો અને આગેવાનો શહેરમાં જયાં ત્‍યાં હોર્ડિંગમાં ફોટા લગાવીને શહેરનાં નેતા હોવાનો ઢોંગ કરી રહૃાા છે.

શહેરમાં બિસ્‍માર માર્ગો ઉપરાંત રખડતા પશુઓ, બેફામ ગંદકી અને ટ્રાફીક સમસ્‍યાનો કોઈ ઉકેલ લાવી શકતા નથી. કાર્યકરો નેતાઓ સાથે અને નેતાઓ મોટા નેતાઓ સાથે ફોટોસેશન કરાવવામાંથી નવરા પડતાં નથી.

આમ તો શહેરમાં સમસ્‍યા કરતાં હજાર ગણા રાજકીય કાર્યકરો વિવિધ પ્રકારનાં હોદાઓ લઈનેસીનસપાટા કરી રહૃાા છે પરંતુ એક પણ કાર્યકર કે નેતાને શહેરની સમસ્‍યા દુર કરવાની ઉતાવળ ન હોય શહેરની દોઢ લાખની જનસંખ્‍યા આજે સ્‍વ. ડો. જીવરાજ મહેતા, સ્‍વ. ખોડીદાસ ઠકકરને યાદ કરી રહી છે.