Main Menu

અમરેલીનાં એસ.ટી. ડેપોમાં અંધાધુંધીનો માહોલ

કાદવ કિચડ, પાગલોનો ત્રાસ, પંખાઓ બંધ સહિત અનેક સમસ્‍યા
અમરેલીનાં એસ.ટી. ડેપોમાં અંધાધુંધીનો માહોલ
એસ.ટી. બસ પણ મનફાવે તે રીતે પાર્ક કરવામાં આવતાં મુસાફરો પરેશાન
અમરેલી, તા. 3
મુસાફરોની સુવિધા વધારવાનાં બદલે દુવિધાનાં ઢગલારૂપ અમરેલી બસ સ્‍ટેશનમાં કાદવ-કિચડ, ગાંડાનો ત્રાસ, પંખાઓ બંધ, એનાઉન્‍સ માઈક બંધ તેમજ રોગચાળાને નોતરી રહેલ શૌચાલયનો ખુલ્‍લા મળનાં ખાડાથી ત્રાહીમામ પોકારી ઉઠેલ મુસાફરો બસ સ્‍ટેશનમાં આવતાની સાથે જ નર્કાગારનો અહેસાસ કરી રહેલ છે.
અમરેલી એસ.ટી. વિભાગીય નિયામક એસી ચેમ્‍બરમાં આરામ ફરમાવી રહેલ છે. જયારે અમરેલી બસ સ્‍ટેશનની હાલત એટલી હદે કફોડી થઈ ચૂકેલ છે કે મુસાફરોને બસ સ્‍ટેશનમાં પ્રવેશ કરવો મુશ્‍કેલ બનેલ છે. વિભાગીય નિયામક તેમજ ડેપો મેનેજર ઘ્‍વારા મુસાફરોની સુવિધા વધારવાનાં બદલે દુવિધા વધારવાનું બિડુ ઝડપેલ હોય તેમ ડેપોમાં પ્રવેશતા જ મુસાફરોને ખુલ્‍લા શૌચાલયની દુર્ગંધ મારતા મળનાં ખાડાનો સામનો કરવો પડે છે. ત્‍યાંથી આગળ જતાં કાદવ-કિચડ અને રબડીરાજનો સામનો કર્યા બાદ બસ સ્‍ટેશનમાં ઉભા રહેતા પંખા બંધ હાલતમાં હોવાથી મુસાફરો પરસેવાથી રેમજેબ થઈ જાય છે. આટલેથી સમસ્‍યા અટકતી નથી. બસ સ્‍ટેશન મુસાફરોનાં બદલે ગાંડાનો અડો બની ગયેલ હોયતેમ ગાંડાઓ બિભત્‍સ ગાળો બોલતાં મુસાફરો-મહિલાઓનાં હાથ પણ પકડી લેતા મુસાફરોમાં ભારે ડરના માહોલ વચ્‍ચે એસ.ટી. તંત્રની ઘોર બેદરકારી સામે ભારે આક્રોશની લાગણી છવાયેલ છે.
ગાંડાનાં ત્રાસથી બસ સ્‍ટેશનમાં અફડાતફડી મચી જવા છતાં પણ એસ.ટી. તંત્ર ઘ્‍વારા મુસાફરોની સલામતી માટે પગલા ભરવાનાં બદલે મુશ્‍કેલીમાં સબડતા છોડી દેવા સામે મહિલાઓમાં ભારે આક્રોશ છવાયેલ છે.
વિભાગીય નિયામક તેમજ ડેપો મેનેજર ઘ્‍વારા મુસાફરોની મુશ્‍કેલીમાં મુક પ્રેક્ષક બની રહેવાનાં બદલે ડેપોમાં સર્જાયલ અંધાધુંધીનાં માહોલ સામે મુસાફરોને સુવિધા યુકત માહોલ રચવા પગલા ભરવા માંગણી ઉઠેલ છે. સાથો સાથ એસ.ટી. બસો જે તે પ્‍લેટફોર્મ ઉપર જ ઉભી રાખવા માંગણી ઉઠેલ છે.