Main Menu

દરેક પોલીસ સ્‍ટેશનમાં એન્‍ટી રોમિયો સ્‍કવોર્ડની જરૂર

શાળા-કોલેજો, મંદિરો અને બહેનોની બજાર પર નજર રાખવા માટે
દરેક પોલીસ સ્‍ટેશનમાં એન્‍ટી રોમિયો સ્‍કવોર્ડની જરૂર
બાઈક પર પગ ચડાવીને આરામ ફરમાવતાં અને જાહેરમાર્ગ પર સીનસપાટાનાં દ્રશ્‍યો રોજીંદા બન્‍યા
અમરેલી, તા. ર
અમરેલી જિલ્‍લાનાં દરેક શહેરોમાં શાળા-કોલેજો, મંદિરો અને બહેનોની બજારમાં રોમિયોગીરીએ હદ વટાવી દીધી હોય નિષ્ઠાવાન પોલીસ અધિક્ષકે દારૂ, જુગાર અને રેતીચોરી પર કાબુ મેળવી લીધો હોય હવે રોમિયોગીરીને કડક હાથે ડામી દે તેવી માંગ જિલ્‍લાભરમાંથી ઉભી  થઈ છે.
અમરેલી, સાવરકુંડલા, રાજુલા, ધારી, બગસરા સહિતનાં લગભગ તમામ શહેરોમાં શાળા-કોલેજો આસપાસ તેમજ મંદિરો કે બહેનોની અવર-જવર માર્ગ પર રોમિયો બાઈક પર પગ લંબાવીને આરામ ફરમાવતાં હોય છે. ચિત્ર વિચિત્ર વેશભુષા, ફિલ્‍મી હીરો જેવી   દાઢી, હાથમાં મોબાઈલ સાથે હીરોગીરી કરતાં શખ્‍સોનું દ્રશ્‍ય સામાન્‍ય થઈ ગયું છે. રોમિયોનાં બાઈકમાં કાનફાડી નાખે તેવા હોર્ન, આંખ આંજી દે તેવી લાઈટ અને ત્રિપલ સવારીમાં ધુમ સ્‍ટાઈમાં બાઈક ચલાવીને દરેક શહેરોની શાંતિનો ભંગ કરનાર રોમિયો સામે લાલ આંખ કરવાનો સમય આવી ચુકયો છે.
અમરેલીનાં સરદાર સર્કલ, કોલેજ ચોક, સુર્યા ગાર્ડન, નાગનાથ ચોક, લાયબ્રેરી રોડ, હરિરોડ, ભીડભંજન ચોક, બસ સ્‍ટેન્‍ડ સહિતનાં વિસ્‍તારોમાં રોમિયોનાં ઠેકાણા બન્‍યા છે. રાત્રીનાં સમયે 9થી 1ર સુધી સરકીટ હાઉસ, ઓમનગર કોર્નર, બસ સ્‍ટેન્‍ડ, કોલેજ ચોકમાં રોમિયો દ્રશ્‍યમાન થઈ રહૃાા હોય પોલીસ અધિક્ષકે દરેક પોલીસ સ્‍ટેશનમાં એન્‍ટી રોમિયો સ્‍કવોર્ડની રચના કરીને રોમિયોગીરીનાં દુષણને કડક હાથે ડામી દેવું જોઈએ તેવી માંગ ઉભી થવા પામી છે.