Main Menu

ભીંગરાડમાં 100 વિઘા ગૌચર જમીનમાં ખોદાણ

કહેવાતા દાતાએ ગરીબ પરિવારોને કર્યો અન્‍યાય
ભીંગરાડમાં 100 વિઘા ગૌચર જમીનમાં ખોદાણ
100 વિઘા ગૌચરમાંથી માટી કાઢીને પોતાની ખેતીની જમીનમાં ઠાલવી દીધી
લીલીયા, તા.ર
લાઠી તાલુકાના ભીંગરાડ ગામે એકાદ માસ પહેલા ગામના પાદરમાં આવેલ સરકારી ગૌચરની જમીન એકસો વિઘા કરતા વધુ જમીનમાં તળાવ બનાવવાના ડોળ તળે જમીન ખોદી માટી નીકળી તે દાતા હોવાનો દેખાવ કરતા એક દાતાએ તેમના મળતીયાઓ સાથે મળી પોતાના ખેતરોમાં માટી પુરી દીધી. જેને લઈ મોટા પ્રમાણમાં ગૌચરની જમીનને નુકશાન પહોંચાડી લાખો રૂપિયાની માટી ચોરી કરી લઈ ગયા હોવાની સ્‍થાનિક પૂર્વ સરપંચ વિનુભાઈ સોલંકી, મનસુખભાઈ રામાવત, હરપાલ રાઠોડે અગાઉ જિલ્‍લા કલેકટર લાઠી પ્રાંત અધિકારી, મામલતદાર સહિતના લોકોને મૌખિક, લેખિત રજૂઆતો કરેલ હોવા છતાં રાજકીય વગ ધરાવતા કહેવાતા દાતા સામે કાર્યવાહી કરવામાં જવાબદાર અધિકારીઓ અચકાઈ રહયા છે.
કહેવાતા દાતા સામે વિકાસના નામે ગામના ગરીબ પરિવારો માટે ખડાવાળમફત પ્‍લોટ માટે નકકી થયેલ જમીન પોતાના બંગલા પાસે આવેલ હોવાથી પોતાના બંગલા પાસે આર્થિક અને સામાજિક રીતે કોઈ પછાત જ્ઞાતિ જાતિના લોકો રહેવા ન આવે તે માટે ખળાવાડ મફત પ્‍લોટ માટે નકકી થયેલ જમીન પર બિનકાયદેસર રીતે સમાજની વાડી અને પ્‍લે ગ્રાઉન્‍ડના રૂપકડા નામ આપી કમ્‍પાઉન્‍ડ હોલ બનાવી તાળા લગાવી દઈ સરકારી જમીન પચાવી પાડવા પેરવી હાથ ધરી છે. તેની સામે ગ્રામજનોમાંથી ફરિયાદ ઉઠતા પોતાના ગળામાં ગાળીયો ના આવી જાય તે માટે ગામના ભોળા અને સારા લોકોને    ભોળવી ભીંગરાડ ગોકુળ ગામ સેવા સમિતિની કાગળ પર રચના કરી પોતે દાન આપી રહયા છે. કામની રીતો ગોકુળ સેવા સમિતિ કરી રહી છે. પણ ગ્રામ પંચાયત પાસે તમામ કામગીરી કરી રહયા હોવાના ઠરાવો લેવામાં આવ્‍યા છે. આ અંગે તટસ્‍થ તપાસ કરવામાં આવે તો મોટા પ્રમાણમાં ગેરરીતિ બહાર આવે તેમ છે.