Main Menu

હાહાકાર : ભાડનાં ગામજનોને દીપડાએ પરેશાન કરી દીધા

રહેણાંક મકાનમાં ઘૂસીને ગાય-ભેંશનું કરે છે મારણ
હાહાકાર : ભાડનાં ગામજનોને દીપડાએ પરેશાન કરી દીધા
છેલ્‍લા ર દિવસથી દીપડાએ અર્ધો ડઝન મકાનમાં શિકાર કરતા ભયનો માહોલ
ગામનાં સરપંચ નવનીતભાઈ અકબરીએ વન વિભાગને લેખિતમાં જાણ કરી
ખાંભા, તા.30
ખાંભા તાલુકાના ભાડ ગામ તદન ગીર અને મિતીયાળા અભ્‍યારણની નજીક આવ્‍યું હોવાથી અવાર નવાર સિંહ અને દીપડા ગામે ચડી આવે છે અને ગામમાં જ પશુ સહિત પ્રાણીના શિકાર કરે છે. ત્‍યારે એક દીપડાએ તો ભાડ ગામમાં આતંક મચાવ્‍યો છે. અને બે દિવસમાં સાત જેટલા ઘરમાં રાત્રીના ઘૂસી અને બે પશુના શિકાર કર્યા તેમજ અન્‍ય ત્રણ પશુને ગંભીર ઈજા પહોંચાડતા ગામલોકો દીપડાથી ત્રાહીમામ પોકારી ઉઠયા છે. જેમાં ગામના ગોવિંદભાઈ કાલાભાઈ સવરાના ઘરમાં ઘૂસી વાછરડાને ઈજા કરેલ. બાદ ગોબરભાઈ ગોકુલભાઈ અલગોતરનાઘરમાં ઘૂસી વાછરડીનો શિકાર કર્યો તેમજ લાલજીભાઈની બકરી પર હુમલો કરી ઈજા કરેલ હતી અને ગામના જ ધીરૂભાઈ હિરપરા અને કરસનબેન દરબારના ઘરમાં ઘૂસી જતા ભાડ ગામ લોકો ભયભીત થઈ જતા આ દીપડાને પકડવા વન વિભાગને રજૂઆત કરેલ છે. અને ભાડ ગામ લોકોને રાત્રીના ઘરની બહાર નીકળવું પણ મુશ્‍કેલ બન્‍યું છે.
ભાડ ગામના સરપંચ નવનીતભાઈ અકબરીને પૂછતા તેઓએ જણાવ્‍યું હતું કે સિંહ તો ગામમાં અવાર નવાર ઘૂસી જાય છે પરંતુ એક દીપડાએ છેલ્‍લા બે દિવસથી ગામમાં આતંક મચાવ્‍યો હોય તેમ ગામના રહીશ છ થી સાત જેટલા ઘરમાં ઘૂસી દીપડાએ બે પશુઓના શિકાર કર્યા છે અને અન્‍ય ત્રણ પશુઓને નાની મોટી ઈજા કરેલ છે. અમે આજે ખાંભા વનવિભાગને લેખિત રજૂઆત કરી છે અને આ દીપડો અન્‍ય કોઈ માણસ પર હુમલો કરે તે પહેલા દીપડાને પકડવા પાંજરૂ મુકવા વન વિભાગ પાસે માંગ        કરેલ છે.