Main Menu

ડુંગરમાં વરસાદથી દવાખાનાનો માર્ગ ધોવાઈ ગયો

રાજુલા તાલુકાના ડુંગર ગામે સરકારી દવાખાના પાસે આવેલ પુલ જે છેલ્‍લા બે વર્ષથી તૂટી ગયેલ છે. આ બાબતે અનેક વખત ઉચ્‍ચ કક્ષાએ રજૂઆતો થવા પામેલ છે. પરંતુ ડુંગર ગ્રામ પંચાયત દ્વારા થોડી ઘણી ધૂળ નાખી મસમોટા બીલ બનાવી સગેવગે કરવામાં આવે છે. આ પુલ ડુંગર ગ્રામ પંચાયત માટે દુજણી ગા સમાન બની ગયેલ છે. આ બાબતે એમ.એલ.એ.થી માંડી મંત્રીઓ સુધી રજૂઆતો થવા પામેલ છે. પરંતુ ગામના અમુક કાર્યકરો આ બાબતે જસ લઈ ન જાય તે માટે ગ્રામ પંચાયત આંખ આડા કાન કરી આ નાળુ ન બને તેવા જ પ્રયત્‍નો કરતા હોય છે. જેના કારણે સરકારી અધિકારીઓ તથા પદાધિકારીઓ દ્વારા અન્‍યાય કરવામાં આવી રહયો છે. આ અંગે ડુંગરના જાગૃત નાગરિક અને એડવોકેટ મંજુર ગાહા દ્વારા કોર્ટમાં રીવીઝન દાખલ કરવામાં આવેલ છે. જેનું પરિણામ પેન્‍ડીંગમાં છે. આ નાળુ તે કારણે હાલતો દર્દીઓ, રાહદારીઓ તેમજ બાળકો પસાર થઈ શકતા નથી. જેથી યોગ્‍ય થાય તેમ ગામજનો ઈચ્‍છી રહયા છે.