Main Menu

સાવરકુંડલામાં કોંગી બળવાખોર પાલિકાનાં પ્રમુખબન્‍યા

ભાજપનાં 1પ નગરસેવકોએ કોંગ્રેસનાં 4 બળવાખોરને સમર્થન આપ્‍યું
સાવરકુંડલામાં કોંગી બળવાખોર પાલિકાનાં પ્રમુખબન્‍યા
બાગી નગરસેવકે સૌથી નાની વયે પાલિકા પ્રમુખ બનીને ઈતિહાસ સર્જી દીધો
સાવરકુંડલા, તા. 14
સાવરકુંડલા નગર પાલિકાનાં પ્રમુખ-ઉપપ્રમુખની આજે હાઈ વોલ્‍ટેજ ડ્રામા સાથે ચૂંટણી યોજાઈ હતી. કોંગ્રેસનાં ર0 અને ભાજપનાં 16 સભ્‍યો હતો. જેમાં 4 કોંગ્રેસનાં સભ્‍યો બળવો કરી ભાજપ સાથે ભુગર્ભમાં ઉતરી ગયા હતા. જેથી ભાજપ ર0 સભ્‍યોની બહુમતી સાથે સાવરકુંડલા પાલિકામાં સત્તા સ્‍થાને બેસી ગયું.
સાવરકુંડલા નગરપાલિકા કચેરી-દરબારગઢ ખાતે ચુસ્‍ત પોલીસ ગોઠવાઈ હતી. માત્ર સદસ્‍યો સિવાય કોઈને એન્‍ટ્રી અપાઈ નહોતી. પત્રકારોને પણ આવવા દેવાયા નહોતા. ત્‍યારે આ હાઈવોલ્‍ટેજ ડ્રામાંમાં ધારાસભ્‍ય અને પોલીસ વચ્‍ચે એન્‍ટ્રી બાબતે સામાન્‍ય ચકમક પણ ઝરી હતી. આ માહોલમાં પૂર્વ કૃષિમંત્રી વી.વી. વઘાસીયા, જિલ્‍લા ભાજપ પ્રમુખ હિરેન હિરપરા, ઉપપ્રમુખ રવુભાઈ ખુમાણ સહિતના ભાજપના વિશાળ કાર્યકરો, હોદેદારો નવોદીત પ્રમુખને વધાવ્‍યા હતા અને દરબારગઢથી જ વિશાળ વિજય સરઘસ કાઢવામાં આવ્‍યું હતું.
ભાજપ સત્તા સ્‍થાને બેઠુ અને કોંગ્રેસનાં હાથમાંથી બાજી પલટી જતાં આ અંગે આ વિસ્‍તારનાં કોંગી ધારાસભ્‍યએ પ્રતિક્રિયા આપતા જણાવ્‍યું હતું કે, અમારા 4 સભ્‍યોને ભાજપે બાર-બાર લાખ રૂપિયા આપી ખરીદી લીધા છે. પરિણામે ભાજપ ફાવ્‍યું છે પરંતુ એ સત્તાકાયમી ટકશે નહી.
ત્‍યારે સાવરકુંડલા પાલિકામાં કોળી ઠાકોર સમાજને અત્‍યાર સુધીના ઈતિહાસમાં પ્રથમ વખત જ તક મળી છે અને સૌથી નાની વયનાં પ્રમુખ બન્‍યા છે. ત્‍યારે હવે આ જ સભ્‍યોએ કોંગ્રેસ પર માની ન શકાય તેવા બજેટમાં રજુ કરાયેલ ખર્ચ સામે બળવો કર્યો હતો. તો હવે એ જોવાનું રહે છે કે આ ભ્રષ્‍ટાચાર ખુલ્‍લો કરશે ? શહેરનો વિકાસ કરશે કે પોતાનો ? જેવા અનેક સવાલો જનતામાંથી ઉઠવા પામ્‍યા છે.