Main Menu

રાજુલામાં ભૂમાફીયાઓ વિરૂદ્ધ આંદોલન કરતી ર મહિલાની તબિયત લથડી

રાજુલા તાલુકાના દરિયાકાંઠા વિસ્‍તારના પીપાવાવ ધામનાસરપંચ તથા 300 જેટલા ગામજનો છેલ્‍લા 44 દિવસથી જીએચસીએલ કંપની વિકટર તથા ભૂમાફીયાઓના કબજામાંથી ગામની જમીન મુકત કરવવા માટે રાજુલા પ્રાંત કચેરી સામે ઉપવાસ આંદોલન કરી રહયા છે. તેમજ જીલુભાઈ બારૈયા, મધુભાઈ સાંખટ, સાદુળભાઈ શિયાળ, બાબુભાઈ સાંખટ, આતુભાઈ શિયાળ સહિત પાંચ લોકો છેલ્‍લા 3ર દિવસ આમરણાંત ઉપવાસ કરી રહયા છે. સરકારી તંત્રમાં માનવતા જેવું કાંઈ રહયું જ ના હોય તેવું લાગી રહયું છે. આંદોલનના એટલા દિવસોથી લોકો ભૂખ્‍યા પેટે ન્‍યાય માંગી રહયા છે. તો અધિકારીઓ હજુ પણ ભાજપના મળતીયાઓને બચાવવાના પ્રયત્‍નો કરી રહયા છે. ગામના સરપંચ તથા ગામજનોને જાણ વગર જ અધિકારીઓ જમીન માપણી કરીને રવાના થઈ ગયા. આથી પીપાવાવ ધામના સરપંચ હંસાબેન ભાણાભાઈ ગુજરીયા દ્વારા નાયબ કલેકટર, મામલતદાર અને અમરેલી કલેકટરને લેખિત રજૂઆત કરવામાં આવી કે જે તે સમયે જીએચસીએલ કંપનીની જમીન અને અન્‍ય જમીનની માપણી કરાવવામાં આવે ત્‍યારે ગામ પંચાયતને વિશ્‍વાસમાં લેવામાં આવે અને માપણી સમયે ડી.આર.એલ. તથા અન્‍ય જવાબદાર અધિકારીઓની સાથે ગામ પંચાયતના સભ્‍યો, સરપંચ તેમજ સ્‍થાનિક લોકોને રાખી જમીન માપણી કરાવવામાં આવે જેથી સચોટ અને યોગ્‍ય માપણી થાય. જેથી આંદોલનકારીઓને કોઈ શંકા ના રહે અનેજો ગામના સ્‍થાનિક લોકોની ગેરહાજરીમાં માપણી કરવામાં આવશે તો આંદોલનકારીઓ આ માપણીને માન્‍ય ગણશે નહીં તે અંગે અધિકારીઓએ નોંધ લેવી. આંદોલન દરમિયાન ધનુબેન જગાભાઈ સાંખટ, નાનુબેન નરશીભાઈ ગુજરીયાની તબિયત લથડતા એમ્‍બ્‍યુલન્‍સ મારફતે રાજુલા સરકારી હોસ્‍પિટલમાં ખસેડવામાં આવ્‍યા હતા. આંદોલનકારીઓ દ્વારા જણાવાયું હતું કે અધિકારીઓ ભૂમાફીયાઓ તથા કંપનીના અધિકારીઓ કહે તેટલું જ પાણી પીવે છે. આંદોલનનો 1.પ મહિના જેટલો સમય છતાં પણ સરકારી બાબુઓને હજુ સુધી ભૂમાફીયાઓનું સાચું દબાણ દેખાણું નથી. અને આગામી દિવસોમાં જો દબાણ દૂર કરવામાં નહીં આવે તો લોકો પોતાની જાતે જ દબાણ દૂર કરશે.