Main Menu

સાવરકુંડલાની મામલતદાર કચેરીને ઘેરાવ કરતા ખેડૂતો

લીખાળા ગામનાં ખેડૂત પિતા-પુત્રની વનવિભાગે ધરપકડ કરતાં
સાવરકુંડલાની મામલતદાર કચેરીને ઘેરાવ કરતા ખેડૂતો
કિસાન સંઘની આગેવાનીમાં 1 હજાર જેટલા ખેડૂતોએ કર્યો હલ્‍લાબોલ
સાવરકુંડલા, તા. પ
સાવરકુંડલા તાલુકાના લીખાળા ગામે પાંચેક દિવસ પહેલા જયસુખભાઈ સુહાગીયાની વાડીનાં ખુલ્‍લા ભાડીયા કુવામાં એક સિંહ અને 10 નીલગાયનાં મૃતદેહો હોવાની જાણકારી મળતાં વનવિભાગની ટીમ ઘટના સ્‍થળે પહોંચી ડોગ સ્‍કોર્ડ અને એફએસએલની મદદથી ગુનો ઉકેલવાની તજવીજ હાથ ધરી હતી અને વાડી માલિક જયસુખભાઈ અને તેના પિતા નનુભાઈની ધરપકડ કરી કોર્ટમાંથી રીમાન્‍ડ તા. પ/6/18 સુધીનાા મેળવ્‍યા હતા.
ત્‍યારે આ ઘટનામાં વનવિભાગે નીલગાયનાં મોત યુરીયાવાળુ પાણી પીવાથી અને સિંહનું મોત વીજ કરંટથી થયાનો અહેવાલ આપ્‍યો હતો. ત્‍યારે આજે આ પિતા-પુત્રના સમર્થનમાં સમગ્ર લીખાળા ગામ અને કિસાન સંઘ વહારે આવી વનવિભાગ સામે મોરચો માંડયો હતો. સવારે 11 કલાકે ટ્રેકટરો ભરીને સુત્રોચ્‍ચાર સાથે શહેરમાં ફરી રસ્‍તાઓ ચકકાજામ કરી માર્કેટીંગ યાર્ડમાં એક જાહેરસભા યોજી ઉગ્ર પ્રત્‍યાઘાતો રજુ કરાયા હતા. અને નિર્દોષ ખેડૂતોને જયાં સુધી છોડવામાં નહી આવે ત્‍યાં સુધી ઉગ્ર વિરોધ કરવાની વાત કરી હતી. અને સભા બાદ મામલતદાર કચેરીનો ઘેરાવ કરીકચેરીને બાનમાં લીધી, ઘેરો કરી હજારો મહિલાઓ, ખેડૂતોએ કચેરીમાં જ નીચે બેસી ગયા હતા. ત્‍યારે ઘટના ઉગ્ર સ્‍વરૂપ ધારણ ન કરે એ માટે પોલીસનો પુરતો બંદોબસ્‍ત રખવામાં આવ્‍યો હતો.