Main Menu

સાવરકુંડલાનાં કરજાળા ગામનાં આધેડ ઉપર ફોર વ્‍હીલ ચડાવી દઈ હત્‍યાનો કરાયો પ્રયાસ

ગામની નદીમાંથી રેતી ભરવાની ના પાડતા
સાવરકુંડલાનાં કરજાળા ગામનાં આધેડ ઉપર ફોર વ્‍હીલ ચડાવી દઈ હત્‍યાનો કરાયો પ્રયાસ
બેઝ બોલનાં ધોકા, પાઈપ વડે માર મારી આધેડને તળાવમાં ફેંકી દીધા
અમરેલી, તા.4
અમરેલી જિલ્‍લામાં ખનીજ ચોરીએ માજા મુકી છે. અને આ ખનીજ ચોરી જો કોઈ અટકાવવાનો પ્રયાસ કરે તો યેનકેન પ્રકારે હેરાન-પરેશાન કરાય છે. ત્‍યારે સાવરકુંડલા તાલુકાના કરજાળા ગામે નદીમાંથી રેતી ભરી અને વેંચવાની ના પાડનાર કરજાળા ગામના એક આધેડ કોન્‍ટ્રાકટર ઉપર જીવલેણ હુમલો કરી, બેઝ બોલના ધોકા તથા પાઈપ વડે માર મારી બાજુના તળાવમાં ફેંકી દેતા આ બનાવ અંગે સાવરકુંડલા રૂરલ પોલીસ સ્‍ટેશનમાં ફરિયાદ નોંધાતા ભારે ચકચાર મચી જવા પામી છે.
આ બનાવમાં પોલીસ સૂત્રોમાંથી જાણવા મળતી વિગત મુજબ સાવરકુંડલા તાલુકાના કરજાળા ગામે રહેતા અને કોન્‍ટ્રાકટરનો વ્‍યવસાય કરતા વિઠ્ઠલભાઈ રવજીભાઈ વાડદોરીયા નામના પ0વર્ષીય આધેડે કરજાળા ગામની નદીમાં ચલાલા ગામે રહેતા પદુભાઈ ભગત નામના ઈસમ રેતી ભરવા આવતા હોય, અને તે રીતે વેંચી નાખતા હોય જેથી આ વિઠ્ઠલભાઈએ તેમને રેતી ભરવાની ના પાડતા આ અંગેનું મનદુઃખ રાખી ચલાલાના પદુ ભગત તથા ત્રણ અજાણ્‍યા ઈસમોએ ગત તા.ર/6ના રોજ બપોરે ઓળીયા ગામથી કરજાળા જવાના રોડ ઉપર પુલ પાસે આધેડનું મોટર સાયકલને પાછળથી ભટકાવી દઈ અને આ આધેડ કોન્‍ટ્રાકટર પડી જતા આ ચારેય ઈસમોએ પોતાના હવાલાવાળી ફોરવ્‍હીલ તેમની ઉપર ચડાવી દઈ બન્‍ને પગમાં ફેકચર કરી તથા શરીરે નાની-મોટી ઈજાઓ કરી, જાનથી મારી નાખવાના ઈરાદે બેઝબોલ તથા પાઈપ વડે આડેધડ માર મારી અને તળાવમાં ફેંકી દીધા હતા.
આ અંગે વિઠ્ઠલભાઈ વાડદોરીયાએ સાવરકુંડલા તાલુકા પોલીસ સ્‍ટેશનમાં 4 ઈસમો સામે આઈ.પી.સી. કલમ 307, 3ર3,3રપ, 114 તથા જી.સી.એ. 13પ મુજબ ફરિયાદ નોંધાવતા પી.એસ.આઈ. ડી.કે. સરવૈયાએ વધુ તપાસ હાથ ધરી છે.