Main Menu

લીલીયામાં એકીસાથે અર્ધોડઝન મકાનોને નિશાન બનાવી ફફડાટ ફેલાવતા તસ્‍કરો

અમરેલી, તા.8
અમરેલી જિલ્‍લામાં તસ્‍કરોએ પોલીસને ખુલ્‍લો પડકાર ફેંકી તરખાટ મચાવતા ગઈકાલે લાઠી- રાજુલામાં સાત મકાનને એક જ રાતમાં નિશાન બનાવી દોઢ લાખની તસ્‍કરીની ઘટના બાદ ગત રાતના તસ્‍કરો લીલીયામાં ત્રાટકતા એકી સાથે છ મકાનોને નિશાન બનાવી તરખાટ મચાવતા આમ જનતામાં ફફડાટ ફેલાયેલ છે. છ ઘટનામાંથી પોલીસમાં એક પણ ફરિયાદ નોંધાવેલ નથી.
પ્રાપ્‍ત વિગત મુજબ ગઈકાલે રાતના લાઠીમાં છ અને રાજુલામાં બે ચોરીની ઘટનામાં પોલીસ નિશાચરોનું પગેરૂ શોધી શકેલ નથી. ત્‍યાં ગતરાતના લીલીયા પોલીસને તસ્‍કરોએ ઉંઘતી ઝડપી લઈ 6 બંધ મકાનોને નિશાન બનાવી તાળાના નકુચા તોડી ઘરમાં ઘુસી હાથફેરો કરી નાસી છુટેલ હતા. એક જ રાતમાં 6 મકાનોને નિશાનબનાવી તસ્‍કરોએ પોલીસને ખુલ્‍લો પડકાર ફેંકેલ છે. છ ઘરમાંથી પાંચ મકાન માલીકો બહારગામ હોવાથી ઘરમાંથી કેટલી તસ્‍કરી થયેલ છે તેની વિગત સાંપડી શકેલ નથી. 6માંથી એક મકાન માલીક આવી ગયેલ હતા પરંતુ હજુ સુધી તેઓએ ફરિયાદ નોંધાવેલ ન હોવાનું ફરજ પરના પી.એસ.આઈ.એ જણાવેલ હતું.
તસ્‍કરો અમરેલી જિલ્‍લાને છેલ્‍લા છ માસથી એપી સેન્‍ટર બનાવી ધમરોળી રહેલ છે. છતાં આજદિન સુધી પોલીસ તસ્‍કરો હવામાં ઓગળી ગયા હોય તેમ સગડ મેળવી શકેલ નથી. તમામ ચોરી બંધ મકાનના તાળા તોડવાના બદલે નકુચા તોડીને જ કરવામાં આવે છે.


« (Previous News)