Main Menu

લાઠીના દુધાળા ગામે જળ સંચય અને વૃક્ષા રોપણની ઉમદા કામગીરીનું દ્રષ્‍ટાંત પુરૂ પાડયું

400 વીધામાં ફેલાયેલ તળાવમાં રપ0 કરોડ લીટર પાણી સંગ્રહ થશે
લાઠીના દુધાળા ગામે જળ સંચય અને વૃક્ષા રોપણની ઉમદા કામગીરીનું દ્રષ્‍ટાંત પુરૂ પાડયું
ખેડૂતોને ત્રણ પાક લેવા માટે અનુકુળ પરિસ્‍થિતિનું નિર્માણ થશે
અમરેલી, તા.4
સમગ્ર રાજયમાં ચાલી રહેલ સુજલામ સુફલામ જળ અભિયાન અંતર્ગત અમરેલી જિલ્‍લામાં પણ નદીઓ, તળાવો અને ચેક ડેમો ઊંડા ઉતારવાની કામગીરી પૂરજોશમાં ચાલી રહી છે.
સુરત સ્‍થિત દાતા સવજીભાઇ ધોળકીયાએ વતનનું ઋણ ચૂકવવા સામાજીક કાર્યો હાથ ધરી તા. ર3 માર્ચ – ર017 થી દુધાળા ગામે હરિકૃષ્‍ણ સરોવરનું નિર્માણ કાર્ય હાથ ધરેલ છે. આ ઉપરાંત બા નું સરોવર અને દાદા નું સરોવરનું નિર્માણ કાર્ય શરૂ કરેલ છે.
જળસંચય અને વૃક્ષારોપણની ઉમદા કામગીરીનું દ્રષ્ટાંત પૂરૂં પાડતા લાઠીના દુધાળા ગામે આગામી ચોમાસા દરમિયાન તળાવોમાં વરસાદી પાણી ભરાતા રળિયામણાં દ્રશ્‍યો સર્જાશે.હરિકૃષ્‍ણ સરોવર ઉંડા ઉતારવાની કામગીરી પર દેખરેખ રાખતા કનકભાઇ પટેલે જણાવ્‍યું કે, આ તળાવને ઉંડું ઉતારવા ર4 કલાક કામગીરી કરવામાં આવી રહી છે. 400 વીઘામાં ફેલાયેલા આ તળાવને ઉંડું ઉતારવામાં આવી રહ્યું છે તેમજ ફળદ્રુપ માટીનું 300 વીઘામાં પૂરાણ કરવામાં આવ્‍યું છે. આ તળાવને 8 થી 17 ફુટ સુધી ઉંડું ઉતારવાની કામગીરી પૂર્ણ થતાં અંદાજે સવા લાખ ટ્રક જેટલી માટી ખેડૂતોના ખેતર સુધી પહોંચશે. વધુમાં તળાવની પાળી – દિવાલોના નિર્માણ માટે મનરેગા યોજના તળે કાર્ય કરવામાં આવતા મજૂરોને રોજગારી મળી રહી છે.
પટેલે વધુમાં કહ્યું કે, તળાવ ઉંડા ઉતારવાની સાથો સાથ ઉપયોગમાં ન આવી શકે તેવી માટીનો ઉપયોગ કરી ટેકરીનું નિર્માણ કર્યુ અને ત્‍યાં  મૂર્તિઓ ગોઠવવામાં આવી છે. નર્સરીની સેવાનો લાભ લઇ અંદાજે સવા લાખ વૃક્ષોનો ઉછેર કરવામાં આવી રહ્યો છે. આ વૃક્ષોમાં દેશીકુળના વૃક્ષોનું વાવેતર કરવામાં આવતા પંખીડાઓ માટે આશરો બનશે અને પક્ષીઓનો કલરવ પણ ગૂંજી ઉઠશે. આમ, આ તળાવનો સર્વગ્રાહી વિકાસ થઇ રહ્યો હોય આગામી સમયમાં આ પર્યટન સ્‍થળ તરીકે વિકસી શકે તેવી પૂરતી સંભાવનાઓ છે.
કનકભાઇએ વધુમાં કહ્યું કે, દુધાળાના આ સરોવરમાં અંદાજે રપ0 કરોડ લીટર પાણીનો સંગ્રહ થવાની ક્ષમતા છે. જળસંચયનીકામગીરીને લીધે જમીન નવસાઘ્‍ય થવાની છે, જેનો લાભ દુધાળા સહિત આજુ બાજુના ર0 ગામોને થશે તેવો અંદાજ છે. દાતા સવજીભાઇએ દુધાળા ઉપરાંત શેખપીપરીયા, ઝરખીયા, અકાળા તેમજ લીલીયામાં પણ જળસંચયની પ્રવૃત્તિમાં સહભાગી બની સમાજ સેવાનું ઉત્તમ દ્રષ્ટાંત પૂરૂં પાડ્‍યું છે. ‘જળ એ જ જીવન’ મંત્ર સાથે દાતા સવજીભાઇએ ગુજરાતમાં 11 સરોવરનું નિર્માણ કરી ચૂક્‍યા છે.
સરપંચ ભૂપતભાઇ મેસુરીયા-  અકાળાવાળાએ કહ્યું કે, આ કામગીરી દરમિયાન ફળદ્રુપ માટીનો કાંપ ખેતરોમાં પહોંચ્‍યો છે. તળાવમાં વરસાદી પાણીનો સંગ્રહ પણ થશે તેમજ જળસંચય થતાં જમીનના તળ ઉંચા આવશે. ખેડૂતોને ત્રણ પાક લેવા માટે પણ અનુકૂળ પરિસ્‍થિતિનું નિર્માણ થવાની સંભાવના છે. આ ઉપરાંત પીવાના પાણીની સમસ્‍યાનું પણ નિવારણ થશે, તેમ જણાવ્‍યું હતુ.